ᐊᓂᐣ ᐁᐃᓇᐧᑌᐠ ᐱᒧᒋᑫᐃᐧᐣ

ᐁᑲᐧ ᐊᓂᔑᓇᐯ ᐊᐢᑭ ᒪᒥᑎᓀᐣᒋᑲᐣ ᒥᓄᔭᐃᐧᐣ ᐃᐧᒋᐦᐃᐁᐧᐃᐧᐣ ᐱᒧᒋᑫᐃᐧᐣ (ᓇᐣ ᐸᑯᓭᐣᓂᒧᐃᐧᐣ) ᑕᔑᑫᐃᐧᓂᐠ ᐅᒋᐱᒧᒋᑲᑌ, ᒥᓇ ᐊᓂᔑᓂᓂᐤ ᐃᔑᒋᑫᐃᐧᐣ ᐊᐸᒋᒋᑲᑌ ᐁᑲᐧ ᒪᒥᑎᓀᐣᒋᑲᐣ ᒥᓄᔭᐃᐧᐣ ᐁᑲᐧ ᑲᑎᐯᓂᒥᑯᐨ ᒪᒋᑫᑯᐣ ᐃᐧᒋᐦᐃᐁᐧᐃᐧᐣ ᐅᒋᑕᒪᐊᐧᐊᐧᐠ ᐊᐃᐧᔭᐠ ᐅᐅᒪ 49 ᐊᓂᔑᓇᐯᐤ ᑕᔑᑫᐃᐧᓇᐣ ᑲᑕᑲᐧᑭᐣ ᐊᓂᔑᓇᐯ ᐊᐢᑭ ᐅᑭᒪᐃᐧᓂᐠ.

ᐁᑲᐧ ᐊᓂᔑᓇᐯᐤ ᐱᒧᒋᑫᐃᐧᐣ ᐸᑯᓭᐣᑕᑲᐧᐣ ᒋᐃᐧᒋᑐᒋᐣ ᒪᒥᑎᓀᐣᒋᑫᐤ ᒥᓄᔭᐃᐧᓇᐣ ᐃᐧᒋᐦᐃᐁᐧᐃᐧᓇᐣ ᑲᓇᑕᐁᐧᐣᑕᒧᐊᐧᐨ ᐊᐃᐧᔭᐠ ᑭᐁᐧᑎᓄᐠ ᐅᐣᑌᕑᐃᔪ, ᒥᓇ ᑲᒥᓇᑲᓄᐊᐧᐨ ᒪᒥᑎᓀᐣᒋᑫᐤ ᒥᓄᔭᐃᐧᐣ ᒥᓇ ᑲᑎᐯᓂᒥᑯᐨ ᒪᒋᑫᑯᐣ ᐃᐧᒋᐦᐃᐁᐧᐃᐧᐣ. ᐅᐅᐁᐧ ᐃᔑᓇᑲᐧᐣ ᐱᒧᒋᑫᐃᐧᐣ:

• 24/7 ᐱᒧᓭᒪᑲᐣ ᐃᐧᒋᐦᐃᐁᐧᐃᐧᐣ ᓇᑕᐁᐧᐣᑕᒪᐣ ᒋᐃᔑᑭᑐᔭᐣ ᐁᑲᐧ ᐊᐸᒋᑐᐣ ᐁᑲ ᑲᑎᐸᐦᐃᑲᑌᐠ ᒪᒋᑭᑐᔭᐣ 1-844-NAN-HOPE (626-4673)
• ᐊᐦᐃ ᐊᐸᒋᑐᐣ ᒪᒪᑕᐃᐧ ᐱᐊᐧᐱᐠ ᓇᐣᑕ ᐃᔑᒪᓯᓇᐦᐃᑫᐣ ᐅᐅᒪ nanhope.ca
• ᐁᑲᐧ ᑲᐊᐧᐸᑕᐦᐃᑯ ᑲᑕᑲᐧᑭᐣ ᐃᐧᒋᐦᐃᐁᐧᐃᐧᓇᐣ ᑕᔑᑫᐃᐧᓂᐠ ᒥᓇ ᐅᐅᒪ ᓀᑫᑲᒥᐠ ᑲᐊᔭᑭᐣ ᐃᐧᒋᐦᐃᐁᐧᐃᐧᓇᐣ, ᒥᓇ ᑲᐧᔭᐠ ᒋᐃᐧᒋᒋᑲᑌᑭᐣ ᑲᓄᑕᓭᑭᐣ ᐃᐧᒋᐦᐃᐁᐧᐃᐧᓇᐣ;
• ᐃᐧᐸᐨ ᒋᐅᑎᓇᒪᐣ ᐁᑲ ᑲᐃᐧᒋᑲᑌᐠ ᐊᔭᒥᐦᐃᐁᐧᐃᐧᐣ ᐅᐅᒪ ᒪᒋᑭᑐᐃᐧᓂᐠ; ᐁᑲᐧ,
• ᒋᐃᐧᒋᐦᐃᑯᔭᐣ 24/7 ᑭᒋᒪᒋᓭᔭᐣ/ᐊᐧᐊᐧᓀᐣᑕᒥᓭᔭᐣ ᐃᐧᒋᐦᐃᐁᐧᐃᐧᐣ.

ᑲᑭᓂᐱᓭᐠ ᑲᑕᑲᐧᐠ ᐊᔭᒥᐦᐃᑐᐃᐧᐣ ᐃᐧᒋᐦᐃᐁᐧᐃᐧᓇᐣ

ᐁᑲᐧ ᐊᔭᒥᐦᐃᑐᐃᐧᓇᐣ ᑲᐸᑭᑎᓇᒧᐊᐧᐨ ᒪᐊᐧᐨ ᑲᐃᐡᐱᐢᑲᐊᐧᐨ ᑭᒋᒪᒥᑎᓀᐣᒋᑫᐤ ᒪᐡᑭᑭᐃᐧᓂᓂᐊᐧᐠ, ᒥᓇ ᑭᒋᐊᓄᑭᓇᑲᓇᐠ, ᐁᑲᐧ ᒪᐡᑭᑭᐃᐧᑫᐧᐠ, ᒥᓇ ᐊᓂᔑᓇᐯᐤ ᐅᑕᔭᒥᐦᐃᐁᐧᐠ, ᐁᑲᐧ ᑲᑭᓇ ᐅᑭᑫᐣᑕᓇᐊᐧ ᑫᑐᑕᒧᐊᐧᐨ ᒥᓇ ᐁᓇᐦᐃᐊᐧᐨ ᓇᓇᑲ ᑫᑯᓇᐣ ᑲᑐᑕᒧᐊᐧᐨ. ᐁᑲᐧ ᑲᔭ ᓂᑕ ᐊᓂᔑᓂᓂᒧᐊᐧᐠ ᒥᓇ ᓂᑕ ᐊᓂᔑᓇᐯᒧᐊᐧᐠ, ᐁᑲᐧ ᓂᑕ ᐁᐧᒥᑎᑯᔑᒧᐊᐧᐠ, ᐁᑲᐧ ᑲᑭᓇ ᐅᑭᑫᐣᑕᓇᐊᐧ ᐊᓂᔑᓇᐯᐊᐧᑎᓱᐤ ᐊᔭᑲᐧᒥᓯᐃᐧᐣ ᑭᐦᑭᓄᐦᐊᒪᑫᐃᐧᐣ ᒥᓇ ᐅᓇᑲᒋᑐᓇᐊᐧ ᒋᒥᓇᐊᐧᐨ ᒥᓇ ᒋᐃᐧᒋᔭᐊᐧᐨ ᐊᓂᔑᓇᐯᐤ ᑕᔑᑫᐃᐧᓇᐣ ᑭᔭᑦ ᑫᒋᐁᐧ ᓇᑯᓯᐊᐧᐨ ᓇᐣᑕ ᑲᔭ ᒪᒋᑭᑐᐃᐧᓂᐠ ᐅᒋᐃᐧᑕᒪᑫᐊᐧᐨ.

ᐁᑲᐧ ᑲᑕᑲᐧᑭᐣ ᐊᔭᒥᐦᐃᑐᐤ ᐃᐧᒋᐦᐃᐁᐧᐃᐧᓇᐣ ᑕᐱᐡᑯᐨ ᐊᐃᐧᔭ ᓇᓇᑲ ᒪᒥᑎᓀᐣᒋᑫᐤ ᒥᓄᔭᐃᐧᓂᐠ ᑲᐃᔑᐊᓂᒥᓭᐨ, ᑐᑲᐣ, ᐅᑫᐧᓂᐊᐧᐣ ᐊᐧᐊᐧᓀᐣᑕᒥᓭᐃᐧᓇᐣ: ᑲᑎᐯᓂᒥᑯᐨ ᒪᒋᑫᑯᐣ, ᑲᒥᑲᓇᑲᓄᐨ, ᑲᐃᐧᐅᑕᐱᓇᐠ ᐅᐱᒪᑎᓱᐃᐧᐣ, ᑲᒪᒋᑐᑕᓯᐨ, ᑲᑭᒋᔑᑲᑌᐣᑕᐠ, ᑲᐊᐧᐊᐧᓀᐣᑕᐠ, ᓇᐣᑕ ᑲᒥᒋᓇᐁᐧᓭᐨ/ᑲᓂᓭᓂᒧᐨ.

ᓇᓇᑲ ᐃᐧᒋᐦᐃᐁᐧᐃᐧᓇᐣ ᑲᐃᔑᓇᑲᐧᑭᐣ ᐅᑫᐧᓂᐊᐧᐣ:

• ᑫᐃᔑᐃᐧᒋᐦᐃᑯᔭᐣ ᐊᓂᔑᓇᐯᐤ ᐊᔭᒥᐦᐃᑐᐃᐧᓂᐠ
• ᑫᐃᔑᐃᐧᒋᐦᐃᑯᔭᐣ ᐊᓂᐣ ᑫᐃᔑᑲᐧᔭᐠ ᒪᒥᑎᓀᐣᑕᒪᐣ
• ᑫᐃᔑᐃᐧᒋᐦᐃᑯᔭᐣ ᐊᓂᐣ ᐁᑲ ᑫᐃᔑᒪᒋᒪᒥᑎᓀᐣᑕᒪᐣ
• ᑫᐃᔑᐃᐧᒋᐦᐃᑯᔭᐣ ᑲᐃᔑᓇᑭᐡᑲᒪᐣ ᑭᑕᓂᒥᓭᐃᐧᓇᐣ ᑭᐱᒪᑎᓱᐃᐧᓂᐠ
• ᑫᐃᔑᐃᐧᒋᐦᐃᑯᔭᐣ ᐱᐅᑕᓇᐠ ᑫᑯᓇᐣ ᑲᑭᐱᐃᔑᓭᔭᐣ ᑭᐱᒪᑎᓱᐃᐧᓂᐠ
• ᑫᐃᔑᐃᐧᒋᐦᐃᑯᔭᐣ ᑕᐱᐡᑯᐨ ᐱᐅᑕᓇᐠ ᑫᑯᓇᐣ ᑲᑭᐱᐃᔑᓭᔭᐣ
• ᑫᐃᔑᐃᐧᒋᐦᐃᑯᔭᐣ ᑕᐱᐡᑯᐨ ᑲᐃᔑᓭᔭᐣ ᐃᐃᒪ ᑭᐃᐧᒋᐃᐧᑐᐃᐧᓂᐠ
• ᑫᐃᔑᐃᐧᒋᐦᐃᑯᔭᐣ ᐊᓂᐣ ᑫᐃᔑᐱᒪᑎᓯᑲᑕᒪᐣ ᑲᐃᔑᓂᓯᑕᐃᐧᓂᑲᑌᑭᐣ ᑭᓇᑲᒋᐃᐧᓇᐣ